Алматыда «Таза Қазақстан» бағдарламасы аясында «Алматы – біздің ортақ үйіміз» акциясы өтуде. Акцияның негізгі бағыттарының бірі – кәсіпкерлік субъектілерін қала аумағын абаттандыруға және тазалықты сақтауға тартуға бағытталған «Жауапты бизнес – көрікті қала» бастамасы.
Соның аясында бизнес қауымдастығы бірқатар іс-шара ұйымдастырылады. Оған іргелес аумақтарды тазалау, ғимараттардың қасбеттерін ретке келтіру және көгалдандыру жұмыстары кіреді. Сонымен қатар, кәсіпкерлерге Алматы қаласының аумақтарын абаттандыру ережелері түсіндіріліп, абаттандыру паспорттарын әзірлеу бойынша жұмыстар жүргізілуде.
Жобаның мақсаты – жауапты бизнесті қалыптастыру, қалалық ортаны жақсарту және Алматы қаласының тазалығын бірлесе сақтауға тұрғындарды тарту.
«Сауда орталығының ішінде күнделікті тазалық жұмыстары жүргізіліп, тәртіп қатаң сақталады. Біздің компанияда шамамен 40-қа жуық қызметкер бар. Олар тазалық жұмыстарына белсенді түрде қатысады. Сауда орталығына қарасты аумақта қоқыстарды жинап, сыпырып, арам шөптерді жұлып, және қыста қар тазалаймыз. Бизнес үшін тазалық – оның бет-бейнесі. Сауда орталығының таза болуы – біз үшін ең басты міндеттердің бірі. Биыл екінші тоқсанда ағаш отырғызуды жоспарлап отырмыз. Сонымен қатар, субұрқақтарды толық жаңарту жұмыстары қолға алынбақ», – деді маркетинг департаментінің аға менеджері Андрей Токотилов.