Екібастұзда кәсіпорындар 971 млн теңге салықты бюджетке толық қайтарды, - деп хабарлайды aqshamnews.kz.
Прокуратура жүздеген миллион теңгеге салықтың төмендетілгенін анықтады. Екібастұз қаласының прокуратурасы қадағалау қызметі барысында өңірдегі ірі кәсіпорындардың салықты толық әрі уақытылы төлемегенін анықтады.
«Б. Нұржанов атындағы Екібастұз ГРЭС-1» ЖШС-і жабдықтарды жөндеу кезінде кіріс әкелетін қызметке қатысы жоқ тауарлар, жұмыстар мен қызметтер бойынша сомаларды шегерімге жатқызған. Нәтижесінде 421 млн теңге көлемінде салық төленбеген.
Сондай-ақ, «Қазақстандық вагон жасау компаниясы» ЖШС-нің қызметінде өнімді өткізу айналымының төмендегені анықталып, бұл да бюджетке түсетін түсімге әсер еткен — төленбеген салық сомасы 550 млн теңге болды.
Қадағалау актісі негізінде салық органдары камералдық бақылау жүргізіп, салық төлеушілердің қатысуымен әкімшілік тыңдаулар ұйымдастырылды.
Жүргізілген жұмыстардың нәтижесінде анықталған барлық бұзушылықтар жойылып, кәсіпорындар салық міндеттемелерін өз еркімен орындап, жетіспейтін сома толық көлемде мемлекеттік бюджетке аударылды.