147 мың адам шығып кетті.
ҚР Ішкі істер министрі Марат Ахметжанов Үкімет отырысынан кейін БАҚ өкілдеріне берген сұхбатында Қазақстанды паналап жатқан ресейліктер туралы соңғы статистиканы айтты, деп хабарлайды Almaty-akshamy.kz ҚазАқпаратқа сілтеме жасап.
«21 қыркүйектен бастап Қазақстанға неше ресейлік келіп, неше ресейлік шығып кетті?», - деп сұрады БАҚ өкілі.
Министрдің айтуынша, кешеден бері Ресейден Қазақстанға қарай ағылған нөпір бәсеңсіп, қалыпты деңгейге түскен.
«Бұл мәселе бақылауда. Ресейдің 200 мыңнан астам азаматы кірді. Бірақ бүгінгі таңда 147 мыңы шығып кетті. Әрине, ішінара мобилизация жарияланған кездерде үлкен кептелістер болды. Кешеден бастап бұрынғы қалпына келіп отыр. Мысалы, кешегі күнді алатын болсақ, Ресейдің 7 мыңнан астам азаматы мемлекетімізге кірді, 11 мыңға жуығы шығып кетті. Сондықтан қазір келгендер шығып жатыр. Миграциялық ахуал бақылауда. Жан-жақты қарап жатырмыз», - деді Марат Ахметжанов.
Сондай-ақ ол екі арадағы шекаралық қатынастар экономикалық одақ аясында реттелетінін еске салды.
«Екі тараптан да шекарадан өтуші азаматтарға шектеу жоқ, болмайды да. Өйткені Еуразиялық экономикалық одақ аясында құқықтық шартымыз бар. Құқықтық мемлекет болғандықтан, бүкіл іс-қимылды осы заң шеңберінде жасаймыз», - деді ІІМ басшысы.