Шетелдік сарапшы Эдгар Сибергер Қазақстанға атом электр станциясын (АЭС) салудың елге әкелетін артықшылықтары туралы пікір білдірді. Оның айтуынша, Қазақстан өзінің ядролық әлеуетін дамыту арқылы энергетикалық тәуелсіздігін нығайтып, электр энергиясының тапшылығын азайтады, сондай-ақ болашақта көрші елдерге энергия экспорттайтын маңызды серіктеске айналады.
Эдгар Сибергер, Assystem компаниясының бизнесті дамыту бойынша сарапшысы: – Қазақстанның Орталық Азиядағы стратегиялық орналасуы атом энергетикасының дамуы арқылы жаңа мүмкіндіктерге жол ашады, бірақ белгілі бір қиындықтар да тудыруы мүмкін. Ресей мен Қытай сияқты екі ядролық алпауыт ел Қазақстандағы АЭС-тің дамуына қызығушылық танытуда. Осы жағдайларда Қазақстан мұқият әрі салмақты қадамдар жасауы тиіс. Сонымен қатар, елде уран қорының мол болуы табиғи артықшылық береді, бұл Қазақстанның аймақтық энергетикалық нарықтағы негізгі ойыншы болуына мүмкіндік туғызады.
АЭС құрылысы Қазақстанға тек ішкі энергетикалық сұранысты қанағаттандырумен шектелмей, аймақтағы энергия экспорттаушы ел ретінде өз позициясын нығайтуға көмектеседі. Әлемдік нарықта уранның ірі жеткізушісі бола отырып, ел өзінің осы артықшылығын пайдалануы мүмкін. Әсіресе, энергетикалық қуаттылығы артып келе жатқан Қытай мен Ресей нарықтары Қазақстанның энергия экспорттаушы ретіндегі рөлін маңызды етеді.
Энергетикалық нарықтағы жаңа мүмкіндіктер АЭС құрылысы елдің энергетикалық жүйесін жаңғыртуға және электр энергиясын өндіруде тұрақты көздерге қол жеткізуге көмектеседі. Бұл көмірқышқыл газының шығарылуын азайтып, Қазақстанның экологиялық тұрақтылыққа көшуіне ықпал етеді. Сонымен бірге, Қазақстан Орталық Азияның энергетикалық хабы ретінде өзінің рөлін күшейте алады.
Сибергер атап өткендей, елдегі уран қоры АЭС үшін маңызды ресурс болып табылады. Қазірдің өзінде Қазақстан әлемдегі ең ірі уран жеткізушілерінің бірі, және бұл ресурсты тиімді пайдалану елдің ұзақ мерзімді энергетикалық стратегиясын жүзеге асыруға мүмкіндік береді. Ядролық энергетика саласында халықаралық ынтымақтастықты дамыту, оның ішінде Ресей, Қытай, және басқа да ядролық державалармен әріптестік, Қазақстанға қосымша мүмкіндіктер ашуы ықтимал.
Энергетикалық тәуелсіздік пен қауіпсіздік Энергетикалық тәуелсіздікке қол жеткізу Қазақстанның экономикалық қауіпсіздігін күшейтіп қана қоймай, елдің энергетикалық жүйесінің тұрақтылығын арттырады. Әлемде көмір мен газдың бағасы тұрақсыз болып тұрған кезде, атом энергетикасы сенімді және тұрақты электр энергиясы көзі ретінде қарастырылуда. Қазақстан үшін бұл энергетикалық әртараптандыру және ұзақ мерзімді экономикалық тұрақтылыққа жол ашады.
Эдгар Сибергердің айтуынша, Қазақстан ядролық әлеуетін дамыта отырып, халықаралық энергетикалық нарықта беделді ойыншы болу мүмкіндігін тиімді пайдалану керек.