Қазақстан құрамасының үздік боксшыларының бірі Дулат Бекбауов допинг ережесін бұзғаны үшін екі жылға әуесқой спорттан шеттетілді, - деп хабарлайды Aqshamnews.kz тілшісі Халықаралық тестілеу агенттігіне (ITA) сілтеме жасап.
Халықаралық Олимпиада комитетіне қарайтын ITA мәліметінше, Бекбауов соңғы 12 ай ішінде допинг-бақылау мамандарына өзінің орналасқан жері туралы деректерді дұрыс және толық бермеген. Спортшылар үшін бұл антидопингтік талаптың өрескел бұзылуы болып саналады.
Осыған байланысты оған 2025 жылғы 18 қарашадан 2027 жылдың 17 қарашасына дейін екі жыл мерзімге шеттету жазасы қолданылды. Бұл шешім тек әуесқой боксқа қатысты.
Айта кетейік, Дулат Бекбауов 2025 жылдың шілде айында кәсіпқой бокста дебют жасаған. Қолданылған шектеудің оның кәсіпқой мансабына ықпалы жоқ, яғни ол кәсіби рингте өнер көрсете алады.
Дулат Бекбауов – 2023 жылғы әлем чемпионатының күміс жүлдегері, сондай-ақ 2022 және 2024 жылдардағы Азия чемпионаттарында екі мәрте күміс медаль иегері атанған.