Атақты актер әрі продюсер Джеки Чан «Доспехи Бога: Ультиматум» фильмінің режиссері ретінде Қазақстаннан шыққан режиссер Роберт Кунді таңдады, - деп хабарлайды Aqshamnews.kz.
Роберт Кун - әлемдік деңгейдегі экшн-сахналардың қоюшысы. Ол бұған дейін Disney, Paramount, Universal және 20th Century Fox секілді жетекші кинокомпаниялармен жұмыс істеген. Оның қатысуымен түсірілген жобалар қатарында «Особо опасен», «Он - дракон», «Президент Линкольн: Охотник на вампиров», «Майор Гром: Игра» сияқты фильмдер бар.
Salem Entertainment компаниясының мәліметінше, «Доспехи Бога: Ультиматум» картинасының түсірілім жұмыстары 2026 жылдың көктемінде басталады.
Айта кетейік, бұған дейін қазақстандықтар әлеуметтік желіде Джеки Чанның Алматыда жүргенін жарыса жазған болатын. Желі қолданушылары оның елімізге келу мақсатына түрлі жорамал айтқан: бірі футбол матчын көруге келді десе, енді бірі Димаш Құдайбергенмен кездесуге келген болар деп болжады.
Алайда кейін белгілі болғандай, актер Алматыға алдағы фильміне локация қарау үшін арнайы келген. Яғни, «Доспехи Бога: Ультиматум» фильмі Қазақстанда, нақтырақ айтқанда Алматыда түсірілуі мүмкін.