Бүгін Алматы әлемдік музыка аренасының бір бөлігіне айналды.
Дженнифер Лопестің Up All Night атты әлемдік туры аясындағы көптен күткен концерті үшін қалаға 8 мыңнан аса турист арнайы келді. Алдын ала мәліметке сүйенсек, көрермендердің үштен бірі – әлемнің түкпір-түкпірінен келген қонақтар. Бұл - Алматы жаһандық музыкалық индустрияның жаңа орталықтарының біріне айналғанының бір көрінісі.
Концерт билеттері түгелдей сатылып кеткен. Оларды 35-тен аса елдің тұрғындары сатып алған. Ең көп қызығушылық танытқандар: ТМД елдері, Еуропа, АҚШ, БАӘ, сондай-ақ Канада, Түркия, Жапония, Қытай және Оңтүстік Корея азаматтары. Бұл шараның халықаралық деңгейін көрсетіп, Алматының аймақтағы жаңа мәдени астана ретіндегі мәртебесін нығайтады.
Туристер қатарында Қырғызстан, АҚШ, БАӘ, Германия, Түркия, Ұлыбритания, Франция, Латвия, Испания, Беларусь, Грузия, Әзербайжан және Ауғанстаннан келген қонақтар бар. Сондай-ақ Канада, Швейцария, Қытай, Польша, Сауд Арабиясы, Мексика, Катар, Финляндия, Швеция, Дания, Литва, Румыния, Чехия, Украина, Сингапур, Нидерланд, Эстония, Замбия, Таиланд және басқа да көптеген елдерден көрермендер келді.
Шетелдік туристер Алматыда орта есеппен үш-бес күн болып, осы уақыт ішінде шамамен 1 500 доллар жұмсайды. Бұл қаражат қонақүй, мейрамхана, көлік, экскурсия, сауда және өзге де қызметтерге кетеді. Мұндай ауқымды шаралар тек жанкүйерлерді ғана біріктіріп қоймай, туризмнің дамуына да серпін беріп, Алматының мәдени және гастрономиялық астана ретіндегі имиджін күшейтеді, сондай-ақ қаланың негізгі экономикалық секторларындағы белсенділікті арттырады.
Мәскеуден арнайы келген Яна есімді қонақ өз әсерін бөлісті.
«Бұл концертке келгеніме өте қуаныштымын. Қалаыңыз тамаша! Көрікті жерлері, таулары, ас мәзірі керемет! Барлығы ұнады, бұл кеш есімде ұзақ сақталады», - дейді ол.
Алматыдағы концерт қазақстандық жанкүйерлердің өтініші бойынша тур кестесіне қосылған. Ол қаланың әлемдік музыка индустриясындағы жаңа орталық ретіндегі мәртебесін бекіте түсетін мәдени оқиға болмақ.