Алматы қаласында «Бірнеше номинациялар бойынша дін саласының өзекті мәселелері туралы үздік материалдарды (мақалалар, роликтер және т.б.) дайындау бойынша шығармашылық байқауына» қатысты арнайы баспасөз конференция өтті.
Байқауды ұйымдастырудағы мақсат – жұрт назарын дін саласындағы мемлекеттік саясаттың өзекті мәселелеріне аудару. Бұқаралық ақпарат құралдары мен әлеуметтік желілер арқылы халықты дін саласындағы мемлекеттік саясаттың маңызды бағыттары мен экстремистік және радикалды діни ағымдар идеологиясының зияндылығынан хабардар ету. Журналистер мен БАҚ-ты, сондай-ақ дін саласындағы өзекті мәселелер бойынша материалдар жариялайтын басқа да азаматтарды қолдау.
Байқау келесі номинациялар бойынша өткізіледі: «Үздік пікір», «Әлеуметтік желілердегі үздік тақырыптық пост», «Үздік мотивациялық сөз және үндеу», «Интернет-ресурста қазақ тіліндегі үздік мақала», «Интернет-ресурста орыс тіліндегі үздік мақала», «Инстаграм әлеуметтік желісіндегі үздік бейнеролик», «Тикток әлеуметтік желісіндегі үздік бейнеролик».
Аталған 7 номинация бойынша жалпы жүлде қоры 3 150 000 теңгені құрайды.
Аталған байқауды Алматы қаласы Дін істері жөніндегі басқармасының тапсырысы бойынша «Жаухар» ұлттық салт-дәстүрді қолдау қоры» қоғамдық қоры жағынан ұйымдастырылып жатқанын айта кетейік. Конференция барысында байқаудың ұйымдастырылуы мен шарттары жайлы толыққанды ақпарат айтылды.
– Бұл байқау әр жылы дәстүрлі түрде өткізіліп келеді. Өтінімдер мен материалдар осы жылдың 1 қазанына дейін жолдасаңыз болады. Біздер өз тарапымыздан бұл байқауды қатарынан үш мәрте ұйымдастырып келеміз, – деді «Жауһар» қоғамдық қоры директоры Нұрислам ОРАЗАЛЫҰЛЫ.