8 желтоқсанда Женевада өткен Халықаралық көші-қон ұйымы (ХКҰ) кеңесінің жыл сайынғы сессиясында Біріккен Ұлттар Ұйымының бұл құрылымы қазақстандық әнші әрі гуманитарлық қызметпен айналысып жүрген Димаш Құдайбергенді жаһандық ізгі ниет елшісі етіп тағайындады, деп хабарлайды Аqshamnews.kz тілшісі Dimashnews-ке сілтеме жасап.
Dimashnews мәліметінше, бұл тағайындау оның ұйыммен көпжылдық ынтымақтастығының жалғасы. Былтыр Димаш өңірлік ізгі ниет елшісі атанып, миграция, адам саудасы және осал топтардың мәселелерін көтеруге бағытталған гуманитарлық кампанияларға белсенді қатысты. Сондай-ақ БҰҰ Бас хатшысы Антониу Гутерриш Қазақстанға келген кезде өнер арқылы гуманитарлық бастамаларды ілгерілету идеясын ұсынған еді.
Биыл ол ХКҰ-мен ынтымақтастығын кеңейтіп, Рамазан айындағы қайырымдылық акцияларына қосылды және адам саудасына қарсы бастамаларды қолдады. Әлемдік Stranger туры барысында Нью-Йорк, Мехико, Барселона, Лондон және Берлин қалаларында инклюзивтілік пен бірлік туралы ойларын көпшілікке жеткізіп, ХКҰ миссиясының танылуына үлес қосты.
8 желтоқсандағы кеңес отырысында Димаш БҰҰ мүше мемлекеттерінің делегациялары алдында S.O.S d’un terrien en détresse композициясын орындады. ХКҰ бас директоры Эми Поуп әртістің гуманитарлық бастамаларға қосқан үлесін ерекше атап өтті.