Мәжіліс депутаты Нартай Сәрсенғалиев Парламент отырысында сөйлеген сөзінде Қазақстанда ұсынылып отырған жаңа Конституцияның маңызына тоқталып, оның халықтық талқылаудан өткен құжат екенін атап өтті. Депутаттың айтуынша, жаңа Ата заң – елдегі саяси жаңғырудың логикалық жалғасы және мемлекеттік басқаруды, адам капиталы мен ұлттық қауіпсіздікті күшейтетін маңызды қадам, – деп хабарлайды aqshamnews.kz тілшісі.
Мәжіліс мінберінде сөйлеген депутат Нартай Сәрсенғалиев жаңа Конституцияның қабылдану үдерісіне кең көлемде талқылау жүргізілгенін айтты. Оның сөзінше, құжатты дайындауға әр саланың 130 маманы қатысқан. Ал заңгерлер мен қоғам белсенділерінің ұсыныстарын қоса есептегенде, бұл жұмысқа мыңға жуық адам атсалысқан.
Депутат бұл жағдайды бұрынғы Конституциямен салыстырып өтті. Оның айтуынша, бұрынғы Ата заңды небәрі 12 адам жазған, оның үшеуі шетелдік болған. Сондықтан жаңа Конституцияның халықтық сипаты әлдеқайда айқын екенін атап өтті.
Нартай Сәрсенғалиевтің пікірінше, жаңа Конституция – мемлекет басшысы Қасым-Жомарт Тоқаев бастаған саяси реформалардың заңды жалғасы. Құжатта әділетті Қазақстан қағидаты, заң үстемдігі, адам құқықтарын қорғау және мемлекеттік институттарды жаңғырту сияқты маңызды бағыттар қамтылған.
Депутат жаңа Конституцияны түсіндіру мақсатында халықпен кең көлемде кездесулер өткенін де айтты. Өзінің айтуынша, ол «AMANAT» партиясының «Халық сөзі» жобасы аясында арнайы автобуспен елдің барлық өңірін аралап, тұрғындармен жүздескен. 17 облыс пен республикалық маңызы бар үш қаланы қамтыған сапар барысында жаңа Ата заңға қатысты ұсыныстар мен пікірлер жиналған.
Сөз барысында депутат жаңа Конституциядағы бірқатар маңызды өзгерістерге тоқталды. Соның бірі – адам капиталына басымдық беру. Жаңа редакцияда мемлекет білім, ғылым және инновацияны стратегиялық бағыт ретінде танитыны нақты жазылған. Бұл, депутаттың айтуынша, ғылым мен дарынды жастарды қолдауға жаңа серпін береді.
Сонымен қатар жаңа Конституцияда қос азаматтыққа қатаң тыйым салу нормасы нақты әрі түсінікті түрде бекітілген. Бұл талап ұлттық қауіпсіздік пен саяси тұрақтылықты қамтамасыз етуге бағытталған.
Тағы бір маңызды өзгеріс – Парламенттің рөлін күшейту. Бұрын болған президенттік квота нормасы жаңа Конституцияда алып тасталған. Бұл қадам ықпалды Парламент қағидатын нығайтуға бағытталған.
Депутат сондай-ақ теңгені ұлттық валюта ретінде Конституцияда бекіту ұсынысына да тоқталды. Оның айтуынша, бұл норма ұлттық экономиканың тұрақтылығы мен мемлекеттік егемендіктің маңызды белгісі болып саналады.
Бұдан бөлек, Ата заңға өзгерістер енгізу тәртібі де күшейтіледі. Енді Конституцияға өзгерістер тек жалпыхалықтық референдум арқылы қабылданатын болады.
Сөз соңында Нартай Сәрсенғалиев жаңа Конституцияда «мемлекеттік биліктің бірден-бір бастауы – Қазақстан халқы» екені нақты көрсетілгенін атап өтті. Оның айтуынша, бұл қағида халықтың ел тағдырындағы басты рөлін айқындайды.
Депутат жаңа Конституция ел мен жердің иесі саналатын халықтың мүддесіне қызмет етуі тиіс екенін атап өтті.