2027 жылы қазақ халқы үшін аса маңызды тарихи оқиғаның – Бұланты–Білеуті шайқасының 300 жылдығы атап өтіледі. Мәжіліс депутаты Ерболат Сатыбалды осы айтулы дата аясында мерейтойды республикалық деңгейде атап өтуге байланысты Мәдениет және ақпарат министрі Аида Балаеваға депутаттық сауал жолдады, - деп хабарлайды Аqshamnews.kz тілшісі.
Қазақ халқының жоңғар шапқыншылығына қарсы күресіндегі шешуші кезең – Бұланты шайқасы ел тарихында алтын әріппен жазылған.
"1727 жылы Бұланты мен Білеуті өзендерінің арасында болған бұл шайқас қазақ сарбаздарының ұйымшылдығы мен ерлігінің үлгісі ретінде ұлттық жадымызда сақталып келеді. Бұл ұлы жеңіс Әбілқайыр хан бастаған біріккен қазақ қолының жауға күйрете соққы беруі нәтижесінде жүзеге асты", - деді ол.
Мәжіліс депутаты Ерболат Сатыбалдының айтуынша, тарихи маңызы зор осы жеңістің 300 жылдығын лайықты деңгейде атап өту – ұрпаққа тағылым, елдікке қызмет. Оның депутаттық сауалында үш нақты ұсыныс бар:
-
Бұланты–Білеуті шайқасының 300 жылдығына арналған республикалық іс-шаралар жоспарын әзірлеу;
-
Ғылыми-зерттеу, археологиялық және деректанулық жобаларды, сондай-ақ деректі фильмдер мен оқу құралдарын дайындауды мемлекеттік қолдау;
-
Ұлытаудағы Бұланты батырлар стелласын абаттандыру және туризм инфрақұрылымын дамыту.
"Қазақ хандығының 550 жылдық мерейтойы қарсаңында ел мен жердің тағдыры сынға түскен Ұлытау өңіріндегі "Бұланты шайқасы" стелласы ашылған болатын. Ол жерге осы шайқасқа қатысқан Бөгембай, Қабанбай батырлардан бастап көптеген құлпы тастар қойылып, ел жиналып үлкен ас берілген", - деді ол.
.