Депутат Ардақ Назаров Мәжіліс отырысында анасын құттықтады, - деп хабарлайды Аqshamnews.kz тілшісі.
Мәжіліс отырысында заң жобалары қаралғаннан кейін депутаттар түрлі мемлекеттік органдар басшыларына жолданатын депутаттық сауалдарын оқиды. Мәжіліс төрағасының орынбасары Дания Еспаева сөзді Ардақ Назаровқа бергенде, ол сауал қоюдың орнына анасын мерейтойымен құттықтауға рұқсат сұрады.
"Осында отырған барлық азаматтың артында әлемнің жарығын сыйлаған аналар тұр. Бүгін менің анамшымның туған күні еді, 70 жасқа толып отыр. Рұқсат етсеңіз", - деді депутат.
Еспаеваның жауабын күтпестен Назаров сөзін жалғастырды. Бірнеше әріптесі оған қол шапалақтады.
"Қадірлі анашым, сізді туған күніңізбен шын жүректен құттықтаймын. Сіздің мейірімге толы жүрегіңізге, жүзіңізден төгілген нұрға шомылып өстім. Анашым, әкетайым екеуіңіз мәңгі бірге болып, немерелеріңіздің қызығын көріңіздер. Сізді қатты жақсы көремін, сіздің алдыңызда басымды иемін. Аналарыңыз аман болсын", - деді ол.
Кейін ол депутаттық сауалын премьер-министрдің орынбасары Ермек Көшербаевтың атына жолдайтынын айтып, оқып берді. Депутат еліміздегі мерзімді әскери қызметті жаңғырту қажетін көтерді.
Назаров сөзін аяқтаған соң Мәжіліс төрағасы Ерлан Қошанов депутаттың анасын құттықтады.