Бұрын бұларды еңбектеген баладан еңкейген қарияға дейін тұтынатын.
«Россия 1» арнасының «О самом главном» бағдарламасының эфирінде дәрігер әрі тележүргізуші Александр Мясников, өзінің ойынша, ұмытылып кеткен бес кеңестік «суперфудты» атады, деп хабарлайды Almaty-akshamy.kz Lenta.ru сайтына сілтеме жасап.
Мясников балық майын қолдануды ұсынып, оның өте пайдалы екенін атап өтті.
«Кеңес Одағында балабақшадан, мектептен бастап: «Сен балық майын ішесің, ал ішпесең, біз сені мәжбүрлейміз» дейтін. Мұны міндетті түрде ішкізетін », - дейді дәрігер.
Оның айтуынша, балық майын үнемі қабылдаудың арқасында адамның жалпы денсаулығы, иммунитеті және есте сақтау қабілеті жақсарады.
Сондай-ақ, дәрігер гематогенді де пайдалы кеңестік «суперфудтарға» жатқызды.
«Бұл жай ғана шоколад емес болатын. Мұның (гематогенде – шамамен «Lenta.ru») құрамында қантпен бірге сиырдың қаны қосылған темір бар», - деді ол.
Мясников гематогенді қолданудың арқасында қандағы гемоглобин деңгейі көтеріліп, шаршау мен әлсіздік жойылатынын айтып нақтылады.
«Бұрын анемиясының бар-жоғына қарамастан, барлығына гематоген берілетін», - деп еске алды дәрігер.
Сонымен қатар, Мясников тамақтануға теңіз қырыққабатын қосуға кеңес берді. Дәрігер бұл өнімнің йодтың, көп мөлшердегі витаминдер мен антиоксиданттардың көзі екенін айтты.
Дәрігердің айтуы бойынша, кеңес заманында көп үйде кездесетін «шай саңырауқұлағы» да иммунитетті нығайтады және асқазан-ішек жолдары мен жүйке жүйесінің жұмысын жақсартады.
Ал алма сірке суы, дәрігердің түсіндіргеніндей, салмақ тастау және қайызғақпен күресуге көмектеседі. Дәрігер сонымен қатар бұл өнімнің суық тиген кезде қолданылғанын еске алды: науқастың денесін алма сірке суымен сүртіп, денесінің қызуын төмендеткен.