Үндістан астанасы Нью-Делидегі әйгілі туристік аймақта автокөлік жарылып, қайғылы жағдай тіркелді, - деп хабарлайды Аqshamnews.kz тілшісі.
Оқиға салдарынан сегіз адам көз жұмып, тағы 24 адам түрлі жарақат алған.
Жарылыс метроның «Қызыл қамал» («Red Fort») станциясы маңында болған. Куәгерлердің айтуынша, Hyundai i20 көлігі оталып жарылғаннан кейін маңындағы бірнеше автокөлікке де от тиген.
Аталған аудан – Нью-Делидегі ең көп турист баратын орындардың бірі. Бұл жерде елдің тарихи мұрасы саналатын әйгілі Лал-Кила (Қызыл қамал) цитаделі орналасқан. Жарылыс болған уақытта аумақта туристер көп болғаны айтылады.
Үндістанның ішкі істер министрі Амит Шах оқиғаның барлық мүмкін нұсқасы тексеріліп жатқанын мәлімдеді. Жарылыстың нақты себебі әзірге белгісіз. Алдын ала дерек бойынша, көлік не тұрақта тұрған, не бағдаршамда тоқтаған кезде жарылған болуы мүмкін.
Бұқаралық ақпарат құралдарының бірі NDTV бастапқыда 13 адамның қаза болғанын хабарлаған, алайда бұл ақпаратты ресми органдар растаған жоқ.
Оқиға орны толықтай қоршауға алынып, Нью-Делиде жоғары дайындық режимі енгізілді. Қауіпсіздік шаралары бүкіл ел бойынша күшейтілді. Сондай-ақ жарылған көліктің бұрынғы иесі тергеу аясында қамауға алынғаны белгілі болды.