Синоптиктер ауа райына байланысты 7 қыркүйекте еліміздің бірқатар өңірінде дауылды ескерту жариялады, деп хабарлайды aqshamnews.kz.
«Қазгидромет» синоптиктерінің болжамы бойынша, Ұлытау облысының солтүстік-батысында, Абай облысының батысында, солтүстігінде, шығысында оңтүстік-батыстан, батыстан соққан желдің екпіні 15-20 м/с жетеді.
Түнде Шығыс Қазақстан облысының солтүстігінде, шығысында, оңтүстігінде жауын-шашын (жаңбыр, қар) болады. Түнде облыстың солтүстігінде, шығысында тұман түседі. Күндіз облыстың батысында, солтүстігінде, оңтүстігінде оңтүстік-батыстан соққан желдің екпіні 15-20 м/с болады. Түнде облыстың шығысында 2 градусқа дейін суытып, үсік жүреді.
Алматы облысының оңтүстігінде аракідік жаңбыр жауады, Алматы қаласының және облыстың таулы аудандарында жауын-шашын (жаңбыр, қар) болады. Облыстың батысында, оңтүстігінде, таулы аудандарында найзағай ойнап, солтүстік-батыстан соққан желдің екпіні 18-23 м/с жетеді.
Түнде Жамбыл облысының таулы аудандарында жаңбыр жауып, арты бұршақ ұласады деп күтілуде. Облыстың кей жерлерінде солтүстік-батыстан соққан желдің екпіні 23 м/с дейін жетеді.
Қарағанды облысында батысында, солтүстігінде, шығысында жауын-шашын бұршаққа ұласады. Облыстың кей жерлерінде жел екпіні 15-20 м/с жетеді. Түнде облыстың солтүстігінде, шығысында топырақ беті қатып, үсік жүреді, сынап бағаны 2 градус суықты көрсетеді.
Түнде Жетісу облысының таулы аудандарында жауын-шашын соңы қарға ұласуы мүмкін деп болжанып отыр. Күндіз кей тұста жел екпіні 23-28 м/с дейін жетеді.
Түркістан, Атырау, Батыс Қазақстан, Қызылорда облыстарында төтенше өрт қауіпі сақталады.