Қазақстанның басым бөлігінде 6 ақпан, жұма күні ауа райы күрт бұзылады, деп хабарлайды Aqshamnews.kz тілшісі.
«Қазгидромет» таратқан мәліметке сәйкес, ел аумағында қар аралас жаңбыр жауып, жел күшейеді. Кей өңірлерде бұрқасын соғып, көктайғақ қалыптасады. Әсіресе түнгі уақытта Маңғыстау облысының солтүстік-шығысында қатты аяз күтіледі. Ал елдің оңтүстік-батысында, Жамбыл облысының таулы аймақтарында, Түркістан облысының асуларында, Абай облысының орталығында және Жетісу облысындағы Алакөл маңында желдің жылдамдығы секундына 30 метрден асып, қауіпті деңгейге жетуі ықтимал.
Белсенді оңтүстік циклон мен атмосфералық фронттардың әсерінен республиканың солтүстік-батысы, солтүстігі, орталығы және оңтүстігінде тұрақсыз ауа райы сақталады. Бұл аймақтарда қалың жауын-шашын түсіп, кей жерлерде қар аралас жаңбыр жауады. Сонымен қатар тұман түсіп, жолдарда көктайғақ қаупі күшейеді.
Тек батыс және оңтүстік-батыс өңірлерде антициклон сілемінің ықпалымен жауын-шашынсыз, салыстырмалы түрде тыныш ауа райы болжанып отыр. Мамандар тұрғындарға алыс жолға шыққанда барынша сақ болуды және қолайсыз ауа райын ескеруді ұсынады.