Қаржы мониторингі агенттігінің блокчейн-тексеруі нәтижесінде есірткі саудасы мен интернет-алаяқтықтан түскен қылмыстық кірістерді цифрлық валюта арқылы жылыстатқан ірі криптоайырбастау сервисі анықталып, қызметі толық тоқтатылды, - деп хабарлайды Аqshamnews.kz тілшісі.
Қызметке тиесілі 67 әмиян бұғатталып, 9,7 млн USDT (шамамен 5,2 млрд теңге) көлеміндегі актив уақытша тоқтатылды.
Агенттіктің блокчейн-мониторингі барысында анықталған сервис Darknet–тің 20 ірі нарығымен, соның ішінде беделді 5 миллионнан астам қолданушысы бар платформалармен байланыста болған.
Кейінгі үш жылда бұлсервис арқылы ТМД елдеріндегі (Қазақстан, Ресей, Украина, Молдова) 200-ден астам есірткі дүкенінің заңсыз кірістері жылысталғаны анықталды.
Платформаның жалпы айналымы 224 млн АҚШ долларынан асты.
Тергеу барысында 4 000-нан астам криптовалюта әмияны тексерілді; зерттеу нәтижесінде қылмыстық кірістер сақталған әмияндар анықталды.
Қолға алынған шаралар нәтижесінде 67 әмиян бұғатталып, 9,7 млн USDT (5,2 млрд теңге) цифрлық активтер уақытша тоқтатылды.
Сервис толықтай өз қызметін тоқтатты: әлеуметтік желідегі аккаунттары жойылды, клиенттерге қызмет көрсетуі тоқтатылды.
Darknet-тегі мамандандырылған форумдарда есірткі дүкендері тарапынан қаржылық міндеттемелердің орындалмауына байланысты жаппай шағымдар тіркеліп жатыр.
Тергеу және салдары
Қызмет ұйымдастырушыларын анықтау бойынша белсенді тергеу жүргізілі жатыр.
Қабылданған шаралар есірткі бизнесінің көлеңкелі инфрақұрылымына елеулі экономикалық соққы берді: жеткізу тізбектерінің логистикасы бұзылып, нарық айналымы азайды және тұтынушылардың заңсыз платформаларға деген сенімі төмендеді.
Агенттік цифрлық құралдарды пайдалану арқылы қылмыстық кірістерді жылыстату схемаларын тоқтату жұмыстарын одан әрі жалғастыратынын хабарлады.