Алматы қаласының Қоғамдық денсаулық сақтау басқармасы жас футболшының қазасына байланысты ресми ақпарат таратты, деп хабарлайды Aqshamnews.kz тілшісі.
Ведомство мәліметінше, 2006 жылы туған азамат оқиға орнынан жедел жәрдеммен клиникалық өлім жағдайында жеткізілген. Ауруханаға түскен сәтте науқаста тіршілік белгілері байқалмаған: тамыр соғысы мен қан қысымы анықталмай, қарашықтары кеңейген. Дәрігерлер бірден реанимациялық шараларға кірісіп, барлық мүмкін әдістерді қолдана отырып 30 минут бойы өмірін сақтап қалуға тырысқан, алайда көрсетілген көмектерге қарамастан биологиялық өлім тіркелді.
Қайғылы жағдайдың нақты себеп-салдарын анықтау үшін марқұмның денесі сот-медициналық сараптамаға жіберілді. Басқарма өкілдері марқұмның жақындарына көңіл айтып, қайғыға ортақтасты.
«Хан-Тәңірі» клубы да ойыншыға алғашқы медициналық көмектің дер кезінде көрсетілгенін хабарлады. Клубтың мәліметінше, стадионда жедел жәрдем бригадасы кезекшілік етіп, футболшыға жедел көмек көрсетілген, ал жедел жәрдем көлігі оны төрт минут ішінде ауруханаға жеткізген. Дегенмен, дәрігерлердің барлық әрекетіне қарамастан, ойыншыны аман алып қалу мүмкін болмаған.