Астанадағы «Ырыскелді қажы» мешітінің бас имамы Нұрлан Байжігітұлы телефонды дұрыс қолдану әдебі туралы пікір білдіріп, дәретханаға телефонмен кіретіндерді сынға алды. Сонымен қатар, ол азанның дауысын стандартты музыкаға ауыстыру мәселесін де көтерді, деп хабарлайды aqshamnews.kz
«Телефонды қолдануда әдептілік сақтауымыз керек. Азанның дауысын телефонға қоямыз, бірақ оны дұрыс қолданбаймыз. Көпшілігіміз телефонды дәретханаға алып кіреміз. Сол жер ең жайлы орын секілді. Тып-тыныш отырып, телефон шұқылауға қолайлы деп ойлаймыз. Оқитын ештеңе таппасаң, дәретхана қағазын алып оқисың, иіс шығаратын құралдың құрамын оқисың. Сөйтіп H₂O дегенді жаттап аласың. Енді азанның дауысы дәретханада шығып жатса, бұл тіпті сорақы жағдай. Сол себепті азанның дауысын қарапайым музыкаға ауыстыруды сұраймын», – деді Нұрлан Байжігітұлы.
Имамның айтуынша, телефонды қолдануда әдеп сақтап, оның қасиетті мазмұндарға қатысты қолданылуына жауапкершілікпен қарау керек. Бұл тұрғыда азанның дауысына құрмет көрсетуді ерекше атап өтті.