«ҚазАвтоЖол» ұлттық компаниясының басқарма төрағасы Дархан Иманашев «Көкшетау-Астана» бағытындағы ақылы жолдың заманауи дәретханасы демалыс күні неге жабық болғанын түсіндірді, деп хабарлайды аlmaty-akshamy.kz.
Ұлттық компания басшысының айтуынша, Астана мен Көкшетаудың арасында төрт жерде заманауи дәретхана бар екенін баяндады.
«Жағдай былай болды. Демалыс күндері жолдың бойында туристер өте көп болды және әжетханаларға жиі бара бастады. Сол себептен ток мәселесі туындап, насостың розеткасы балқып кеткеннен кейін ол әжетхана жұмыс істей алмады. Сол бір сағаттың ішінде мердігер розетканы әкеліп, ауыстырғаннан кейін насосты қосты. Сол 40 минут, 1 сағаттың көлемінде жаңағыдай ажиотаж болды», - деді «ҚазАвтоЖол» басшысы Үкімет отырысынан кейін өтіп жатқан баспасөз мәслихатында..
Сондай-ақ, ол жол бойындағы дәретханалардың үздіксіз жұмысы бірінші кезекте жолаушылардың ұқыптылығына байланысты деп есептейтінін айтты.
«Тура осындай мәселе демалыс күндері Жетісу облысында да болған. Пайдаланушы дәретханаға жаялық тастаған. Соның салдарынан бітеліп қалды да, әжетхана жарты күн жабық тұрды. Сондай оқиғалар көп болады. Көбі пайдаланушыларға байланысты», - деді Дархан Иманашев.
Айта кету керек, демалыс күндері әлеуметтік желі қолданушылары Көкшетау-Астана бағытындағы ақылы жолдың заманауи дәретханасы жабық тұрғанын айтып, шағымданған еді.