Алматыда «Даму бала» бағдарламасы бойынша оқитын балалар үшін Face ID жүйесі биылдың соңына дейін енгізіледі. Бұл туралы Орталық коммуникациялар қызметінде өткен брифингте Алматы әкімі Ерболат Досаев мәлімдеді, деп хабарлайды aqshamnews.kz
Қала басшысы Алматы қаласының Қоғамдық кеңесімен бірлесіп, секциялар мен үйірмелерді тексеру жүргізілгенін және «Даму бала» бағдарламасы бойынша қызмет көрсетуде адал емес жеткізушілер анықталғанын атап өтті.
«Адал емес жеткізушілер балаларымызды, ата-аналарды алдап отыр, ал кейбір ата-аналар мұндай жағдайларға келісіп жатқанын көріп отырмыз. Қоғамдық кеңеспен бірге үлкен жұмыс атқарылды. Олар көптеген орындарды аралап, шығармашылық үйірмелер болсын, спорттық секциялар болсын, мұндай қызметтердің қандай жағдайларда көрсетілетінін қарап шықты», – деді Ерболат Досаев журналистердің сұрағына жауап бере отырып.
Әкімнің айтуынша, биылдың соңына дейін секциялар мен үйірмелерге қатысуды бақылауды күшейту мақсатында Face ID жүйесіне толықтай көшу аяқталады.
Бағдарламаны қаржыландыруға келетін болсақ, 2025 жылы бюджет биылғы деңгейде сақталады. Қазіргі уақытта қаражат қаланың 8 ауданына бөлінген. Сонымен қатар, қазіргі уақытта балалар контингентінің азаюы байқалуда. Бұл өз кезегінде 2025 жылы кезекте тұрған балалардың бағдарламаға қатысуына мүмкіндік береді.
«Біз жаңа ережелер қабылдадық, оған сәйкес ваучерлер мерзімсіз болмайды. Бір отбасы бірнеше жыл бойы оны пайдалана бермеуі үшін кезек үнемі жаңартылып отырады», – деп қосты әкім.
Сондай-ақ, Ерболат Досаев адал жеткізушілерден жақсы пікірлер түсіп жатқанын айтты.
«Адал емес жеткізушілермен келісімшарттарды тоқтатып жатырмыз. Олар мемлекеттік сатып алу қатысушысы болуы керек болғандықтан, оларды адал емес жеткізушілер тізіміне енгізу қиын. Қазір осы мәселені шешіп жатырмыз, болашақта мұндай жеткізушілерді бағдарламаға қатыстырмауға мүмкіндік болады», – деді Ерболат Досаев.