Coca-Cola Австрияда 28 миллион көлемі 0,5 литрлік пластикалық бөтелкені сатылымнан қайтарып алатын болды. Бұған өнім ішіне қауіпті бөлшектердің түсу қаупі себеп болды, деп хабарлайды aqshamnews.kz
APA агенттігінің мәліметінше, кейбір бөтелкелерге металл фрагменттері түсуі мүмкін. Компания бұл мәселе өндіріс кезіндегі ақауға байланысты туындағанын мәлімдеді: лимонад құю барысында сүзгі сынған болуы ықтимал.
"Мұндай өнімді тұтыну денсаулыққа зиян келтіруі мүмкін болғандықтан, компания барлық партияны кері қайтару туралы шешім қабылдады. Қайтарылатын сусындарға Coke, Fanta, Sprite және MezzoMix өнімдері жатады, олардың жарамдылық мерзімі 2025 жылдың 4 ақпаны мен 12 сәуірі аралығында көрсетілген", – деп жазады басылым.
Бұл Австрияда алғаш рет осыншама көлемдегі өнімді қайтарып алу оқиғасы. Қазіргі уақытта сусынды тұтынғаннан зардап шеккендер жоқ.