20 желтоқсанда Қазақстан футбол федерациясының (ҚФФ) жаңа басшысын сайлау өтеді. Осы оқиғаға байланысты Қазақстан ұлттық футбол құрамасының бас бапкері Станислав Черчесов өз пікірін білдірді, деп хабарлайды aqshamnews.kz
Ресейлік маман үшін ҚФФ президентін сайлау маңызды рөл атқарады. Себебі жаңа басшылық 61 жастағы жаттықтырушымен ынтымақтастықты жалғастыру немесе Лига ұлттары турниріндегі сәтсіз ойындардан кейін келісімшартты бұзу туралы шешім қабылдауы мүмкін.
"Кандидаттар белгілі, олардың ешқайсысын жеке танымаймын. Сайлау – қалыпты процесс. Бұл оқиғаға ерекше толқып отырған жоқпын. Сайлау нәтижесін күтейік, әрі қарай бәрін талқылаймыз", – деді Қазақстан құрамасының бас бапкері Станислав Черчесов.
2024 жылдың 8 қарашасында ҚФФ-ның сол кездегі президенті Әділет Барменқұлов өз еркімен қызметінен кеткен болатын. Дәл сол Барменқұлов Станислав Черчесовты ұлттық құраманың бас бапкері қызметіне шақырған еді.
Ресейлік жаттықтырушының басшылығымен Қазақстан құрамасы УЕФА Лига ұлттары аясындағы алты матчта небәрі бір ғана ұпай жинады.