«Қайрат» командасының бас бапкері Рафаэль Оразбахтин «Интерге» қарсы өткен Чемпиондар лигасы ойынынан кейінгі баспасөз мәслихатында жас шабуылшы Дастан Сәтпаевтың болашағына қатысты пікір білдірді, деп хабарлайды Aqshamnews.kz тілшісі.
Оразбахтин Сәтпаевтың ойынына баға берді.
"Ол – күннен-күнге жарқырап келе жатқан жас жұлдыз. Үлкен әлеуеті бар, сонымен қатар ойын кезінде нағыз жетілген ойыншы екенін көрсете алды. Биыл ол команданың көшбасшыларының бірі болды, маңызды голдар соқты. Біздің осы кезеңге дейін жетуімізде оның үлесі зор. Әлі де ашылмаған мүмкіндігі көп. “Челсидің” оған көз тігуі де тегін емес. Бірақ ол алға жылжуға көмектесетін сенімді қолдарға түсуі керек. Бұл – оның мансабы үшін шешуші сәт", – деді Оразбахтин Sports.kz басылымына берген сұхбатында.
Еске салайық, Милан қаласындағы «Джузеппе Меацца» стадионында өткен Чемпиондар лигасының төртінші тур ойынында «Қайрат» «Интерден» 1:2 есебімен ұтылған еді.