Ауызша немесе жазбаша түрде ар-намысты қорлағаны үшін жауапкершілік қарастырылған.
Қазақстанда әлеуметтік желілердегі үй чаттарында осындай топтарда айтылған балағат сөздер мен тіл тигізу әрекеттері айыппұлға немесе басқа әкімшілік жазаға әкеп соқтыруы мүмкін, деп хабарлайды aqshamnews.kz
Қазақстан Республикасының Қылмыстық кодексінің 131-бабына сәйкес, ауызша немесе жазбаша түрде ар-намысты қорлағаны үшін жауапкершілік қарастырылған.
Қорлау дегеніміз – басқа адамның ар-намысы мен қадір-қасиетін әдепсіз түрде кемсіту. Егер мұндай әрекет ауызша айтылса: Жаза мөлшері: 100 АЕК-ке дейін айыппұл (2025 жылы 393 200 теңге), немесе сол көлемде түзеу жұмыстары, не 120 сағатқа дейін қоғамдық жұмыстар. Ал егер қорлау әлеуметтік желілерде, соның ішінде чаттарда жазылса, жаза біршама қатаңдатылады: Жаза мөлшері: 200 АЕК-ке дейін айыппұл (2025 жылы 786 400 теңге), немесе сол көлемде түзеу жұмыстары, не 180 сағатқа дейін қоғамдық жұмыстар.
Егер сіз ар-намыс пен қадір-қасиетіңізді қорлау фактісіне тап болсаңыз, құқық қорғау органдарына шағымдана аласыз. Шағымға дәлел ретінде чаттағы хат алмасу немесе балағат сөздердің скриншоттарын қоса аласыз. Содан кейін арнайы лингвистикалық сарапшылар мәселені зерттеп, айтылған сөздердің қорлауға жататын-жатпайтынын анықтайды.