Массачусетс технология институтының нейробиологтары жасанды интеллектінің шығармашылық пен миға әсерін зерттеді, деп хабарлайды aqshamnews.kz
Ғалымдар 18-39 жас аралығындағы 54 адам қатысқан тәжірибе жүргізді.
Олар 3 топқа бөлінді:
1. ChatGPT-ді қолданды.
2. Ақпаратты Google-дан іздеді.
3. Өз миымен жұмыс істеді.
Қатысушылар бірнеше тақырыпқа эссе жазды. Тапсырманы орындау кезінде олардың ми белсенділігін ЭЭГ(электроэнцефалография) көмегімен өлшеп, бақылап отырды.
Сонымен:
ChatGPT-ді пайдаланған топтың когнитив белсенділігі төмен болды. Назар салу, ақпаратты өңдеу, шығармашылықпен жұмыс істеу деңгейі нашар.
Үшінші эссені жазғанда олар көшіре бастады, ЖИ берген мәтінді өзгертіп бере салды. Эсселері біркелкі, құрғақ болып шықты. Қатысушылар өзі әзірлеген мәтінді есте сақтай алмады.
Google-ді пайдаланған топ шығармашылық ізденіс жасап, біраз жақсы көрсеткішке жетті.
Ал ешбір технологияның көмегінсіз жұмыс істеген үшінші топтағы адамдардың миы белсенді болғаны анықталды. Олар жазған мәтін де ерекше, тартымды, оригинал болып шықты.
Зерттеушілер әсіресе миы енді дамып келе жатқан жастардың ChatGPT-ге көп жүгінуі олардың ойлау қабілеті үшін қауіпті деген түйінге келді.
ЖИ-ге тым тәуелділік нейрон байланысын әлсіретеді, жадыны нашарлатады, сыни ойлауға кедергі болады дейді нейробиологтар.