Бұтақты шатқалында инженерлік инфрақұрылым жаңғыртылып жатыр, – деп хабарлайды aqshamnews.kz тілшісі.
Алматыда Бұтақты шатқалын инженерлік желілермен қамтамасыз ету жобасы жүзеге асырылуда. Жұмыстар Алматының Энергетика және сумен жабдықтау басқармасының тапсырысы бойынша жүргізілуде.
Жоба аясында орта қысымды газ құбыры мен су бұру желілері салынады. Бұл туристік инфрақұрылымды дамытуға, таулы аймаққа келушілердің жайлылығы мен қауіпсіздігін арттыруға мүмкіндік береді. Қазіргі уақытта құрылыс-монтаж жұмыстары басталып кетті.
Газ құбырының жалпы ұзындығы 2,7 шақырым. Оның бір бөлігі болат құбырлар арқылы жер үстімен жүргізілсе, екінші бөлігі заманауи полиэтилен құбырлармен жер астына тартылады. Сонымен қатар су бұру желілерінің құрылысы қатар жүргізілуде. Бүгінде мердігер ұйым құбырлардың алғашқы бөліктерін орнатып, темірбетон құдықтарын салды.
Жобаны жүзеге асыру барысында сенімділікке, экологиялық қауіпсіздікке және инфрақұрылымның тұрақтылығына басымдық берілуде. Барлық жұмыс бекітілген жобалық құжаттамаға, құрылыс нормалары мен экологиялық талаптарға сәйкес жүргізіліп жатыр.
Құрылыс-монтаж жұмыстары кезеңінде кейбір учаскеде уақытша шектеулер енгізіліп, арнайы техниканың қозғалысы байқалуы мүмкін. Осыған байланысты қала тұрғындары мен қонақтарынан уақытша қолайсыздыққа түсіністікпен қарау сұралады. Инженерлік желілердің құрылысын 2026 жылы қараша айының соңына дейін аяқтау жоспарланып отыр.