Бүгін Қазақстанның басым бөлігінде жаңбыр жауып, найзағай ойнайды, деп хабарлайды Aqshamnews.kz тілшісі.
«Қазгидромет» мәліметінше, ел аумағына солтүстік-батыс циклоны әсер етіп, батыс пен солтүстік-батыс өңірлерде нөсер жаңбыр, бұршақ және екпінді жел күтіледі. Ал шығыс және оңтүстік-шығыс аймақтарында жауын-шашынсыз ауа райы сақталады.
Синоптиктер республика бойынша жел күшейетінін, кей өңірлерде шаңды дауыл болатынын ескертті. Сонымен қатар Қызылорда, Қарағанды, Павлодар облыстарында, Ұлытау мен Абай облыстарында, Түркістан, Жамбыл, Алматы, Жетісу өңірлерінің бірқатар аумағында жоғары өрт қаупі сақталады. Жетісу облысының оңтүстік және оңтүстік-шығысында төтенше өрт қаупі жарияланған.
Алматыда бүгін күн ала бұлтты болады, жауын-шашын күтілмейді. Ауа температурасы күндіз +28+30 градусқа дейін көтеріледі.
Астанада өткінші жаңбыр жауып, найзағай ойнайды. Күндіз ауа температурасы +25+27 градус болады. Шымкентте де жауын-шашынсыз ыстық ауа райы сақталып, термометр бағаны +34 градусқа дейін жетеді.
Сондай-ақ синоптиктер таулы аймақтардағы өзендерде су деңгейі құбылып, Солтүстік Қазақстан облысындағы Есіл өзенінде су көтерілуі мүмкін екенін ескертті.