Бурабай ауданының прокуратурасы орта мектептердің біріндегі асхананың жұмысын тексеру барысында балалардың қауіпсіздігіне қатер төндіретін бірқатар өрескел заңбұзушылықтарды анықтады, деп хабарлайды Aqshamnews.kz тілшісі.
Прокуратура мәліметінше, оқушыларды тамақтандыру бойынша конкурс жеңіп алған кәсіпкер байқауға жалған құжаттар арқылы қатысқан. Кейін ол өз міндетін бұл салада тиісті біліктілігі де, рұқсат құжаттары да жоқ басқа азаматқа бергені белгілі болды.
Тексеру барысында аталған азаматтың асханада алкогольді шамадан тыс тұтынатын, сондай-ақ осы негізде бұрын ата-ана құқығынан айырылған адамдарды жұмысқа тартқаны анықталған. Қадағалау органының дерегінше, бұл жағдай балалардың өмірі мен денсаулығына тікелей қауіп төндірген.
Прокуратураның ұсынуымен шарт бұзылып, кәсіпкерді мемлекеттік сатып алудың жосықсыз қатысушысы деп тану туралы сотқа талап арыз берілді. Сонымен қатар мектеп директоры қызметінен босатылып, конкурс комиссиясының мүшелері мен аудандық білім бөлімінің қызметкері тәртіптік жауапкершілікке тартылды.