Қырғызстанда бұрынғы президент Алмазбек Атамбаевтың отбасын Бішкек маңындағы Қой-Таш ауылындағы үйінен сот орындаушылары күштеп шығарды, деп хабарлайды Аqshamnews.kz тілшісі.
Экс-президенттің ұлы Қадырбек Атамбаев бұл туралы әлеуметтік желідегі парақшасында жазып, биліктің әрекетін "заңсыздық" деп бағалады.
"Анамды және отбасымның өзге мүшелерін Қой-Таштағы үйден заңсыз шығарып жатыр. Бұл - ата-бабамыздың жері. Бар болғаны 100 метр жерде барлық туыстарымыз жерленген. Бұл - нағыз бассыздық", - деді ол.
Оның айтуынша, іс қалалық сотта қаралып жатқанымен, сот орындаушылары "жоғарыдан келген нұсқау" бойынша еш ескертусіз келіп, отбасы мүшелерін көшеге шығарып, заттарын контейнерге тиеп әкеткен.
Атамбаевтың қызы Әлия Шағиева да ресми құжат немесе сот шешімі көрсетілмегенін айтып, отбасының жауын астында қалғанын жеткізді. Қазір олар туыстарының үйінде уақытша тұрып жатыр.
Мемлекеттік активтерді басқару агенттігі үйдің сот шешімімен мемлекет меншігіне қайтарылғанын мәлімдеді. Бұл жерге қарттар үйі мен 500 балаға арналған балабақша салу жоспарланып отыр. Құрылыс жұмыстары таяуда басталып, келесі жылы аяқталуы тиіс.
Еске салайық, 2019 жылы Қой-Ташта Атамбаевты ұстау операциясы кезінде қақтығыс болып, бір арнайы жасақ қызметкері қаза тауып, жүзден астам адам жараланған еді. 2022 жылы басталған сот процесіне кейін жемқорлық істері қосылды.
2023 жылы Атамбаев Испанияға емделуге кетіп, содан бері отанына оралған жоқ. Биыл маусымда сот оны 11 жыл 6 айға бас бостандығынан айырылып, мүлкін тәркілеу және мемлекеттік марапаттарынан айыру туралы үкім шығарды. Президент Садыр Жапаров үкімді қатаң деп атап, егер Атамбаевтың жақындары өтініш білдірсе, оны кешіруге дайын екенін жеткізген.