Елімізде түрлі ұлыстар татулық пен бейбітшілікте өмір сүруде. Мемлекетіміздегі өзара келісімді нығайту мақсатында 1995 жылдың 1 наурызында Қазақстан халқы Ассамблеясы құрылып, ұлысаралық түсіністік пен бірлікті нығайтуға зор атсалысып келеді.
Бұл бірегей институт өзара келісімді беріктендіру арнасында зерделеу жұмыстарын іске асырып, жастар арасында жүйелі жұмыстар атқарып келеді. Қазақстанның осы бағыттағы мол тәжірибесін өзге мемлекеттер тыңғылықты зерттеуде.
Елімізде 2016 жылдан бері Алғыс айту күні аталып өтуде. Бұл мерекенің мәні аса зор. Алғыс айту күні – отандастарымызды өзара татулыққа, бір-бірін ізгілікпен құрметтеуге, еліміздің тарихын қастерлеуге шақыратын, түрлі ұлыстарды киелі шаңырақ астына ұйыстыратын мереке.
Президентіміз, Nur Otan партиясының Төрағасы Қасым-Жомарт Кемелұлы атап өткендей, «Бұл күні біз елді өркендететін тату тіршілік пен жарасымды сыйластық жолындағы ниетіміздің тоғысқаны үшін бір-бірімізге алғыс айтамыз. Тәуелсіздік кезеңіндегі табыстарға береке-бірліктің арқасында ғана қол жеткіздік.Бұл – егемен еліміздің баға жетпес байлығы».
Ардақты ағайын, Алғыс айту күні құтты болсын! Баршамыздың ниетіміз Отанымыз Қазақстанды өркендетіп, ұйысқан берекемізді нығайтуға арналсын дегім келеді. Әрбір отбасына мол қуаныш пен үлкен жетістіктер тілеймін.