Батыс Қазақстан облысындағы мемлекеттік кәсіпорындардың бірінде 118 миллион теңге бюджет қаражатын жымқыру фактісі анықталды, деп хабарлайды Aqshamnews.kz тілшісі.
Алдын ала дерек бойынша, ойынға тәуелді кәсіпорын бухгалтері мекеме қаржысын заңсыз иемденіп, оны букмекерлік кеңсеге бәске тіккен. Сондай-ақ қолды болған қаражаттың бір бөлігіне жаңа автокөлік сатып алғаны белгілі болды.
Аталған дерек бойынша Қылмыстық кодекстің 189-бабы 4-бөлігінің 2-тармағына сәйкес сотқа дейінгі тергеп-тексеру басталды. Істі арнайы прокурорлар жүргізіп жатыр. Сот санкциясымен күдікті тергеу изоляторына қамалып, сатып алынған көлікке тыйым салынды.
Прокуратура өкілдері бұл жағдай ойынға тәуелділіктің ауыр қылмыстарға әкелуі мүмкін екенін атап өтті. Еске сала кетейік, 2025 жылы өңірде букмекерлік кеңселерде бәс тіккені үшін түрлі мемлекеттік органдардың 16 қызметкері қызметінен босатылған болатын.