Алматы қаласының Бостандық ауданында жыл сайынғы аудандық «RYH MARATHON» спартакиадасының салтанатты ашылуы сәтті өтті.
Іс-шараны Алматы қаласының Жастар саясаты басқармасы мен Бостандық ауданының әкімдігі қолдап, жастар мен спорт сүйер қауымды белсенді өмір салтына ынталандырды, деп хабарлайды aqshamnews.kz.
Спартакиаданың ашылуы аудандағы бос уақыт өткізу орталықтарының тәрбиеленушілері арасында өткен қызықты футбол матчымен есте қалды. Турнирге қатысушылар ойын техникасын ғана емес, шынайы командалық рухты да көрсетті. Турнир басында жарияланған жүлде қоры командаларға қосымша ынталандыру беріп, жеңіске деген ұмтылысты күшейтті.
Футбол турниріне «ZHASTAR», «CRUSH», «ZHANUKAY», «SHALQAR», «DMU» атты бес команда қатысты. Бұл командалар аудан жастарының спорттық бастамаларының көрінісі болып, әрқайсысы достық бәсекелестік атмосферасын қалыптастыруға өз үлесін қосты.
«RYH MARATHON» спартакиадасы алдағы апталарда қатысушылар мен көрермендерді түрлі спорттық сайыстармен қуантады. Жеңіл атлетика, волейбол, баскетбол және басқа да спорт түрлері бойынша бәсекелер өткізіледі. Қатысушылар физикалық дағдыларын жетілдіріп қана қоймай, достық пен ынтымақтастық рухын нығайтуға мүмкіндік алады.
Айта кету керек, Алматыдағы бос уақыт өткізу орталықтары жастардың дамуына үлкен үлес қосады, түрлі үйірмелер мен белсенді бос уақытты өткізетін бағдарламалар ұсынады. Бүгінгі таңда қалада 100 бос уақыт өткізу орталығы жұмыс істейді, олардың базасында 260-тан астам тегін үйірме ұйымдастырылған. Бұл орталықтарда 14 пен 29 жас аралығындағы 12 мыңнан астам жас тіркелген, олардың саны жыл сайын артып келеді.
«RYH MARATHON» спартакиадасы тек спорттық жарыс емес, сондай-ақ жастар арасында көшбасшылық қасиеттерді дамыту мен спорт мәдениетін нығайтуға арналған платформа болып табылады. Іс-шара салауатты өмір салтын насихаттап, қоғамдағы белсенді азаматтық ұстанымды қалыптастыруға ықпал етеді.