Бұл туралы Алматы әкімі Ерболат Досаев аудан тұрғындарымен кездесуде айтты.
Аудан тұрғындарына коммуналдық қызмет көрсету сапасы жақсарады, деп хабарлайды Almaty-akshamy.kz
Қала басшысының айтуынша, 25 км инженерлік желі жаңартылады. 6 км-ден астам су құбыры желісі мен 0,9 км жылу трассасы реконструкцияланады, 16,5 км жоғары вольтты электр кабель желісі мен 1,5 км жерасты газ құбыры жөнделеді. Осы жылдың маусым айынан бастап 2024 жылдың сәуіріне дейін ауданға қосылған аумақтардағы 47,2 км электр желісі жаңартылады. Бұл 150 мыңға жуық тұрғынды сапалы сумен және жылумен қамтамасыз етуге мүмкіндік береді.
Сонымен қатар, әкім тұрғындардың ашуын тудырған қызмет көрсетуші бойынша әкімдік жүргізген жұмысты атап өтті.
«Электрмен жабдықтау, сумен қамту және су бұру қызметтерін сапасыз көрсетуге қатысты айтсам, «Ерменсай» шағынауданының тұрғындарына «Городское предприятие водоснабжения Водснаб» ЖШС-нің (бұрынғы «Орхан» ЖШС) ұзындығы 4,2 км электр желісін қаланың балансына өтеусіз беру туралы шешім қабылданды. Компанияға өзіне 120 млн теңге айыппұл салынды», - деді әкім Ерболат Досаев.