14 қаңтарда Атырау әуежайында FlyArystan әуе компаниясына тиесілі ұшақ қонғаннан кейін ұшу-қону жолағынан шығып кеткен. Ұшақ бортында жолаушылар болған, деп хабарлайды Аqshamnews.kz тілшісі.
Алматы – Атырау бағытындағы FS7202 рейсін орындаған әуе кемесі сәтті қонған. Алайда ұшу-қону жолағын босатып, тұраққа қарай бет алған сәтте ұшақ төмен жылдамдықпен жүру жолынан шығып кеткен.
Әуе компаниясының мәліметінше, бортта 166 жолаушы болған. Олардың барлығы қауіпсіз түрде ұшақтан түсірілген. Жолаушылар мен экипаж мүшелері арасында зардап шеккендер жоқ.
FlyArystan өкілдері оқиғаға байланысты әуежай қызметтерімен және авиациялық билік өкілдерімен бірлесіп, жағдайды белгіленген тәртіпке сай тергеп-тексеру жұмыстары жүргізіліп жатқанын мәлімдеді.