Қаржы мониторингі агенттігі басшысының орынбасары Жеңіс Елемесов Қайрат Боранбаевтың мемлекетке өтеген сомасын жариялады, деп хабарлайды almaty-akshamy.kz
Жеңіс Елемесовтің айтуынша, Қайрат Боранбаев сот талқылауы нәтижесінде мемлекетке 14,5 млрд теңге көлемінде залал өтеді. Бұдан басқа, ол қосымша 120 млрд теңгені өз еркімен өтеген. Осылайша, жалпы өтелген сома 134,5 млрд теңгені құрайды.
«Жалпы, ол сотталған негізгі қылмыстық іс бойынша залал 14,5 млрд теңге көлемінде өтелді. Бұдан басқа, 120 млрд теңге көлемінде залалды өз еркімен өтеді. 120 млрд теңгені 14,5 млрд теңгеге қоссаңыз, 134,5 млрд теңге. Мен бүгінгі күнге дейін өтегенін айтып отырмын. Қылмыстық іс әлі тоқтатылған жоқ, тергеліп жатыр», - деді Елемесов.
Активтер мен бұлтартпау шаралары
Активтерге байланысты сұраққа жауап бере отырып, Елемесов барлық активтердің тіркелгенін, бірақ олардың нақты құны туралы ақпарат бере алмайтынын айтты. Сонымен қатар, Боранбаевқа қатысты қандай бұлтартпау шаралары қолданылғаны және неге ол бостандықта екендігі де талқыланды.
«Бостандық нені білдіреді? Сот шешімімен ол сотталды. Бас бостандығынан айыру жазасы шектеумен ауыстырылды. Электронды білезік тағылған жоқ. Ол қазірдің өзінде шектеулі. Оның бюджет қаражатын ұрлауға және салық төлеуден жалтару бойынша күдікті істері бар», - деді Елемесов.
«Қайрат» футбол клубы туралы
«Қайрат» футбол клубына қатысты Елемесов агенттіктің қылмыстық іс жүргізіп жатпағанын мәлімдеді. Осылайша, бұл клубқа қатысты қылмыстық іс жоқ екенін нақтылады.
Бұл мәлімдеме Қаржы мониторингі агенттігінің Қайрат Боранбаевқа қатысты тергеу жұмыстарының әлі де жалғасып жатқанын көрсетеді. Мәселенің аяқталуы уақыт еншісінде.
Естеріңізге сала кетсек бұған дейін Қайрат Боранбаев 30 млрд теңгені мемлекетке қайтарған болатын.