Щучинск қаласында техникалық және кәсіптік білім беру ұйымдарының студенттері арасында Республикалық жастар слеті өз жұмысын бастады. Еліміздің түкпір-түкпірінен келген 100-ден астам белсенді жас жұмысшы мамандықтарының келешегін талқылап, кәсіби шеберліктерін шыңдауға және жаңа серпін алуға жиналды.
Іс-шараның салтанатты ашылуына ҚР Премьер-министрінің орынбасары Ермек Көшербаев, Оқу-ағарту министрі Ғани Бейсембаев, Ақмола облысының әкімі Марат Ахметжанов, ҚР Парламенті Мәжілісінің депутаттары және бірқатар мемлекеттік органдардың өкілдері қатысты.
Премьер-министрдің орынбасары Ермек Көшербаев слет қатысушыларын құттықтап, жұмысшы мамандықтарының ел дамуындағы маңызын атап өтті:
"Мемлекет басшысы 2025 жылды Жұмысшы мамандықтары жылы деп жариялады. Бұл – тек белгілі бір сала бойынша мамандар даярлау емес, жалпы еңбекке деген көзқарасты қайта қарау қажеттігін білдіреді.
Ұзақ жылдар бойы қоғамда жұмысшы кәсіптеріне қатысты теріс көзқарас қалыптасып келді. Алайда бүгінгі күні жағдай өзгерді. Қазіргі заманның жұмысшысы – жаңа технологияларды меңгерген, еңбек нарығында жоғары сұранысқа ие кәсіби маман.
Біз, мемлекет ретінде, еңбекті қадірлеу мәдениетін қайта жаңғыртып, жұмысшы еңбегіне лайықты құрмет қайтаруға бар күшімізді салып отырмыз. Өйткені индустриялық даму, өндірістің жаңғыруы мен экономикалық тұрақтылық — бәрі сіздердің қажырлы еңбектеріңізге байланысты. Осы өзгерістердің алдыңғы шебінде – сіздер, жас мамандар тұрсыздар", – деді Ермек Көшербаев.