Парламент Сенатының Төрағасы Мәулен Әшімбаев бастаған Атом электр стансасын салуды қолдау жөніндегі Халықтық штабтың мүшеле Ш.Шөкин атындағы Қапшағай ГЭС-інің қызметімен танысып, станса мамандары мен басшылығымен кездесті.
Кездесу барысында елдің энергетикалық секторын дамыту, отандық кәсіпорындарды тұрақты энергиямен қамтамасыз ету және энергетикалық тәуелсіздікті нығайту мәселелері жан-жақты талқыланды.
«Бүгінгі таңда еліміздегі электр энергиясының көпшілігі көмір электр станцияларынан алынады. Алайда бұл модель ұзақ мерзімді энергетикалық тұрақтылықты қамтамасыз ете алмайды. Бізге сенімді әрі қауіпсіз энергия көзі қажет. Атом энергетикасы осы мәселені шешудің ең тиімді жолы болып табылады. Оның артықшылығы — экологиялық таза әрі бірнеше онжылдық бойы Қазақстанды тұрақты энергиямен қамтамасыз ету мүмкіндігіне ие. Сонымен қатар, өзіміздің атом электр стансасын салу арқылы көрші елдерден электр энергиясын импорттау қажеттілігі едәуір азаяды. Бұл еліміздің энергетикалық тәуелсіздігіне қол жеткізуде аса маңызды әрі өзекті қадам болмақ», – деді Мәулен Әшімбаев.
Талқылау барысында атом энергетикасының болашағы, оның экологиялық әсері және еліміздің энергетикалық жүйесіне қосар үлесі кеңінен сөз болды.