Жаңа өндірістер мен жұмыс орындарын ашқан актив иелері ешқандай проблемаға тап болмайды. Мемлекет басшысы Қасым-Жомарт Тоқаев Үкіметтің кеңейтілген кеңесінде осындай мәлімет айтты, деп хабарлайды almaty-akshamy.kz
«Барлық қаражат толығымен экономиканы дамытуға жұмсалуы қажет. Осы орайда қаржыны қайтарып, елімізді өркендетуге атсалысқысы келетін азаматтарға мынаны айтқым келеді. Жаңа индустриялық жобаларға қаржы салыңыздар», - деді Қасым-Жомарт Тоқаев.
Президенттің айтуынша, мұндай актив иелері мемлекеттің оң назарында болмақ.
«Қазақстанда жаңа өндірістер ашып, жаңа жұмыс орындарын құрыңыздар. Сонда мұндай активтерге және оның иелеріне қатысты ешқандай мәселе туындамайды. Тағы да қайталап айтамын. Біз адал әрі ашық жұмыс істейтін бизнес өкілдеріне барлық жағдайды жасаймыз», – деді Мемлекет басшысы.