Бүгін вице-премьер – ұлттық экономика министрі Серік Жұманғарин кеңес өткізіп, еліміздің ЖІӨ өсімінің құрамдас бөлігі мен экономикаға қомақты үлес қосып отырған салалардың даму серпінін арттыру мүмкіндіктерін талқылады. Қай салаларда өсім байқалады? Қай саланы дамыту керек? Биыл ЖІӨ-нің 6 пайыз өсіміне қалай қол жеткіземіз? Толығырақ Аqshamnews.kz материалында.
2025 жылдың қаңтар–мамыр айларында еліміздің жалпы ішкі өнімі 6 пайызға артқан. Бұл – Ұлттық статистика бюросы ұсынған алдын ала мәлімет.
Қай салаларда өсім байқалады?
Экономикалық өсімге негізгі салалардағы – өнеркәсіп, құрылыс, сауда, көлік және байланыс секторларындағы қарқынның үдей түсуі әсер еткен:
- Өнеркәсіп өндірісі биылғы қаңтар–мамырда 6,4 пайызға өсті. Бұл көрсеткіш елдің барлық 17 өңірінде тіркелген өсіммен байланысты;
- Ауыл шаруашылығы саласында оң серпін сақталады – өсім 4 пайыз болды. Айта кетейік, сәуірге дейін көрсеткіш 3,9 пайыз болған.
- Құрылыс саласы қарқынды дамып келеді, бұл сала 15,4 пайыз өсімге жетті. Елдің 18 өңірінде оң динамика тіркелсе, әсіресе Маңғыстау облысында ірі инфрақұрылымдық жобалар есебінен құрылыс көлемі екі есеге артты.
- Негізгі капиталға салынған инвестициялар көлемі 18,2 пайызға ұлғайды. Қаржы ағыны негізінен көлік, өндірістік және әлеуметтік инфрақұрылым жобаларына, сонымен қатар, жаңа өнеркәсіптік нысандар мен заманауи жабдықтарға бағытталған.
- Сауда секторында да тұрақты өсім байқалады. Сауда айналымы 7,8 пайызға артты, бұл алдыңғы айдағы 7 пайыздық көрсеткішпен салыстырғанда біршама жоғары. Ішкі сауда құрылымында көтерме сауда үлесі 68 пайызға жуықтап, осы сегмент 8,3 пайызға өссе, бөлшек сауда 6,5 пайыздық көрсеткішке жетті.
- Байланыс және телекоммуникация саласында 2,8 пайыз өсім тіркелді. Бұған интернет қызметтеріне деген сұраныстың артуы әсер етті. Бұл бағыттағы өсім 13,9 пайыз болды.
- Көлік саласы ең жоғары көрсеткішті көрсетіп отыр – 23,1 пайыз. Мұндай серпінді өсім, ең алдымен, жүк теміржол көлігінің және құбыр арқылы тасымалдау көлемінің ұлғаюына тікелей байланысты.
Биыл ЖІӨ-нің 6 пайыз өсіміне қалай қол жеткіземіз?
Бұл сұраққа вице-премьер – ұлттық экономика министрі Серік Жұманғарин кеңесте жауап берді.
"Біздің мақсатымыз – биыл ЖІӨ 6%-дық өсіміне қол жеткізу. Ол үшін нақты сектордағы барлық сала белгіленген индикаторға сәйкес жұмыс істеуге тиіс. Әкімшілік кедергілерді жедел жойып, компаниялар өз өнімін шығаруды ұлғайтуы үшін әрбір саладағы қарқынның баяулауы есебінен нақты айлық жоспарлар әзірлеу қажет", — деп атап өтті Серік Жұманғарин.