Еңбек және халықты әлеуметтік қорғау министрлігінің мәліметінше, қандастар еңбек күші тапшы аймақтарға қоныстандырылды, деп хабарлайды aqshamnews.kz
Министрліктің мәліметінше, биылғы жылдың басынан бері Қазақстанға 8 051 этникалық қазақ оралып, қандас мәртебесін алды.
1991 жылдан бері елге қайта оралған қазақтардың жалпы саны 1 миллион 156,1 мың адамға жеткен.
Қай елдерден келді?
Қандастардың басым бөлігі Азия елдерінен көшіп келуде:
Өзбекстаннан – 44,2 пайыз;
Қытайдан – 43,2 пайыз;
Түрікменстаннан – 5 пайыз;
Моңғолиядан – 2,7 пайыз;
Ресейден – 2,4 пайыз;
басқа мемлекеттерден – 2,5 пайыз.
Қандай үлесі еңбекке жарамды?
Ресми дерек бойынша, қоныс аударған этникалық қазақтардың 59,1 пайызы еңбек етуге қабілетті. Олардың жартысынан көбі жалпы орта білім алған.
Қандастардың еңбекке қабілетті тобының білім деңгейі мынадай:
жоғары білім – 15,7 пайыз;
арнаулы орта білім – 28,1 пайыз;
жалпы орта білім – 53,5 пайыз;
білімі жоқтар – 2,7 пайыз.
Сонымен қатар, қоныс аударушылардың 31,8 пайызы – кәмелетке толмағандар, 9,1 пайызы – зейнеткерлер.
Қай өңірлерге қоныстанды?
Көшіп келген қандастар еңбек күші тапшы аймақтарға қоныстандырылды. Олар: Ақмола, Абай, Қостанай, Павлодар, Атырау, Батыс Қазақстан, Шығыс Қазақстан және Солтүстік Қазақстан облыстары.
- 2025 жылға арналған өңірлер бойынша қандастарды қабылдау квотасы 2 309 адамды құрайды. 1 тамыздағы жағдай бойынша еңбек күші тапшы өңірлерге 1 286 қандас орналастырылды, – делінген министрлік хабарламасында.