Алматы әкімі Ерболат Досаев Алмалы ауданы тұрғындарымен кездесу барысында электрмен жабдықтау сапасын арттыруға қатысты жоспарды айтты.
Оның айтуынша, 2025 жылы ауданның жарықтандыру деңгейін 100%-ға жеткізу жоспарланып отыр. Тұрғындарды тұрақты электр қуатымен қамтамасыз ету мақсатында 2024 жылы Райымбек – Наурызбай батыр – Мәметова – Сейфуллин (1,3 км) көшелері мен Жамбыл – Әуезов – Абай – Розыбакиев (6,4 км) көшелері аумағында 7,7 км электр желісі жаңартылды. Сонымен қатар, 58,1 км ескі кабель желісі жаңғыртылып, 4,4 мыңнан астам шам ауыстырылды және 193 жарық бағанасы орнатылды. Жалпы, 46 көше мен 185 аула қамтылды.
Қала басшысы биыл да желілерді жаңғырту жалғасатынын атап өтті. Жоспар бойынша 27,1 км электр желісі жаңартылып, 85 трансформаторлық қосалқы станция жөнделіп, 1 жаңа станция салынбақ. Сондай-ақ 4,5 мың шам жаңартылып, 58 км кабель желісі ауыстырылып, 483 жарық бағанасы орнатылады.
Ерболат Досаевтың айтуынша, 2022 жылы басталған электр желілерін жаңғырту бойынша жүйелі жұмыс қазірдің жемісін берді. Алмалы ауданындағы электр желілерінің тозу деңгейі 80%-дан 61%-ға дейін төмендеді.