Ішкі істер министрлігінің ресми өкілі Шыңғыс Алекешев әлеуметтік желідегі жалған ақпараттың таралуына қатысты пікір білдірді. Бұл туралы ол Astana Media Week медиа апталығында бөлісті, - деп хабарлайды Аqshamnews.kz тілшісі.
Ресми өкіл Перизат Қайратты мысалға келтірді.
"Алғашқы сот отырысында ол уақытша ұстау изоляторында соққыға жығылғанын айтты. Дереу тексердік, ол қолын есікке ұрып алғаны анықталды. Бейнежетон, бейнекамералар орнатылып жатыр. Мұндай цифрлық қосымшаларды қосып жатырмыз. Сондай-ақ, 102 мобильдік қосымшасы бар, Kaspi, Halyk, Egov-та шағым жолдай алатын мобильді қызметті іске қостық. Алғашында 500 шағым түссе, қазір 30 мыңнан аса шағым түседі. Қоғамдық орындарындағы SOS батырмалары да бар", - деді ол.
Шыңғыс Алекешевтің айтуынша, бүгінде оқыту бағдарламалары түбегейлі қайта қаралған.
"Жалған ақпаратпен күрес қарқынды жүріп жатыр. Өйткені ол дүрбелең тудырады. Мысалы биыл жалған ақпарат таратқан 64 адам әкімшілік жауапкершілікке тартылып, 14 қылмыстық іс қозғалды", - дейді ол.