2024 жылдың 26 желтоқсанында Қордай аудандық соты «ҚазАвтоЖол» Жамбыл облыстық филиалы басшысының орынбасары Д. Тультаев, «ДорСтрой» ЖШС мердігерлік ұйымының жобасының жетекшісі У. Құрбанов және «Алматы Сапа Инжиниринг» ЖШС техникалық қадағалау сарапшысы Д. Мұсақұлға қатысты үкім шығарды.
Сыбайлас жемқорлыққа қарсы іс-қимыл агенттігінің мәліметінше, олар қазақ-қырғыз шекарасындағы «Қордай» өткізу пунктін салу, кеңейту және қайта құру кезінде 296 миллион теңгеден астам бюджет қаражатын ысырап еткені үшін кінәлі деп танылды.
Сот үкімі бойынша:
- Д. Тультаев пен У. Құрбанов жол-құрылыс және құрылыс жұмыстары саласындағы кәсіпкерлік қызметпен айналысу құқығынан 10 жылға айырылып, әрқайсысына 8 жыл бас бостандығынан айыру жазасы тағайындалды.
- Д. Мұсақұл сәулет, қала құрылысы және құрылыс саласында инжинирингтік қызмет көрсетумен айналысу құқығынан 10 жылға айырылып, 7 жылға бас бостандығынан айыру жазасына кесілді.
Соттың бұл шешімі әлі заңды күшіне енген жоқ.