Сотталған Қуандық Бишімбаевтың бұрынғы әйелі Назым Қаһарман туған күнінде экс-күйеуінен тосынсый алғанын айтты, - деп хабарлайды aqshamnews.kz тілшісі.
Бұл туралы ол әлеуметтік желідегі парақшасында бөлісті.
Назым Қаһарман таңнан бері туыстары мен жақындарынан гүл мен құттықтаулар толассыз келіп жатқанын айтты. Бұдан бөлек оған екі хат келген. Бірі – балалармен қарым-қатынас тәртібін анықтау туралы талап, екіншісі – балаларды шетелге шығаруға қатысты сенімхатты қайтарып алу туралы ескерту.
"Ол туған күніме сыйлығын уақытында жеткізу үшін барын салған сияқты. Таң атпастан одан екі хат алдым. Кеше қол қойыпты, Степногорскіден бүгін жедел түрде "ұшып" келген екен", - деді Назым Қаһарман.
Оның айтуынша, Бишімбаев ортақ балаларына қатысты мәселе бойынша сотқа арыз түсірген. Назым Қаһарман бұрынғы күйеуі балаларына шетелге рұқсатсыз шығуға мүмкіндік беретін сенімхатын қайтарып алғанын айтты.
"Ғажайып нәрсе болмайды екен, өкінішке қарай. Мұндай адамдар ешқашан өзгермейді, керісінше бұрынғыдан бетер нашар бола түседі", - деп жазды Бишімбаевтың бұрынғы әйелі.
Еске салайық, Қуандық Бишімбаев 2024 жылы азаматтық некедегі әйелі Салтанат Нүкенованы ерекше қатыгездікпен өлтіргені үшін 24 жылға бас бостандығынан айырылды.