Қазақстан халқы Ассамблеясына – 30 жыл
Қазақстан – көпэтносты елдердің ішіндегі ең бірегей мемлекеттердің бірі. Бұл жерде жүзден аса ұлт пен ұлыс бір шаңырақ астында тату-тәтті өмір сүріп келеді. Біз үшін халықтар достығы, өзара құрмет пен бейбіт қатар өмір сүру – жай ұран емес, күнделікті өмір салтымыздың негізі.
Еліміздегі күрд халқы да осы ортақ үйдің бір бөлшегі. Біздің қауымдастық – «Барбанг» – Қазақстан тәуелсіздігін жариялаған алғашқы жылдары құрылып, ел ішіндегі тұрақтылықты, ұлтаралық татулықты сақтауға белсене атсалысып келеді. Біз қазақ халқына әрдайым алғысымызды білдіреміз – кең құшағын ашып, тағдыр тәлкегімен келген өзге ұлттарды бауырына басты, бір үзім нанын бөлісіп, бейбіт өмір сыйлады.
Халықтар арасындағы бірлік – бұл мемлекеттің ішкі тұрақтылығы мен дамуының кепілі. Біз мұны әсіресе қазіргі күрделі геосаяси жағдайда терең сезініп отырмыз. Қазақстан халқы Ассамблеясы – бірлік пен достықтың нақты кепіліне айналған бірегей институт. Ол мәдени әртүрлілікті сақтау мен азаматтық бірегейлікті нығайтуда маңызды рөл атқарып келеді.
Тарих бізге бір нәрсені үйретті: ұлттың ұлылығын оның саны емес, берекесі мен бірлігі анықтайды. Сол себепті біз – күрдтер, қазақ елімен тағдырлас, бір халық ретінде, бейбітшілік пен келісімді сақтау жолында еңбек етуді қасиетті міндетіміз деп білеміз. Өз мәдениетімізді сақтай отырып, қазақ мәдениетін де құрметтейміз, мемлекеттік тілді меңгеруді – азаматтық парызымыз деп санаймыз.
Бірлік бар жерде береке бар. Қоғам тыныштығы – әр азаматтың амандығы, болашақтың кепілі. Ал достық – сол бірліктің діңгегі.
Біз – әртүрлі ұлт өкілдері, бірақ бір Отанымыз бар – ол Қазақстан. Бізді біріктіретін – ортақ тағдыр, ортақ болашақ, ортақ құндылықтар. Осы құндылықтарды сақтау – бәріміздің борышымыз.
Халықтар арасындағы достықты нығайту – бүгінгі күннің ғана емес, келер ұрпақ алдындағы да жауапкершілік. Осы жауапкершілікті адал атқару – әр азаматтың міндеті деп есептеймін.