Депутат Ринат Зайыт сауда министрі Арман Шаққалиевтен делдалдармен күрес туралы сұрады, - деп хабарлайды aqshamnews.kz тілшісі.
Депутаттың айтуынша, нарықтағы бағаны "бір көке" қойып отыр.
"Өз цитатаңыздан бастайын. "Баға мен сұрыпталуды бақылау нарықтағы тұрақтылықты қамтамасыз етіп, азаматтардың қажеттіліктерін өтеуге мүмкін береді". Өте дұрыс. Атам қазақ ет қымбаттады дегенде "баланың қызығын тапқан көрсін, малдың қызығын баққан көрсін" деген. Осы ауыл шаруашылығындағы малшылар рахаттанып қалды деп ойладық. Барсақ, ауылдағы ет бағасы қымбаттамаған. Сол баяғы жартас, бір жартас. Тапсырма оррныдалып жатқан жоқ. Делдалдар жүгіріп жүр. Базардағы 5-6 мың ет, ауылда ары кетсе 3 мың теңге. Базарға апарып сатайын десе, "бір көке" отырып алған. Таңғы 4-те апарып үлгерсең өткіздің, үлгермесең бітті. Бағаны қоятын сол. Жәрмеңкеге әкелейін десе, өткендегі жәрмеңкеде өздеріңіз куә болдыңыз. Қанша шаруа "әкімдік орнымызды сатып жіберді" деп шағымданды. Экспортқа шығарайын десе, не жүнін, не терісін шығара алмайды. Етке де лимит қойылған", - деді депутат.
Осы орайда Ринайт Зайыт делдалдармен күресі қалай жүзеге асады және экспорт лимитін қаншаға өсіре аласыздар деген сұрақ қойды.
"Жұмысты жүйелі түрде ай сайын, апта сайын жүргізіп жатырмыз. Сегіз айда 10 мыңнан аса талдау жасадық. Негізі мұндай деректер (делдал - еск.) бар. Біз 700-ден дерекке қатысты әкімшілік іс қозғадық. Саудада делдал болатынын білесіздер. Ет 3 мыңнан басталады, бірақ оған басқа да шығындар қосылады", - деп жауап берді сауда министрі Арман Абайұлы.