2026 жылы Парламентті ұстауға 7,8 млрд теңге бөлінеді, - деп хабарлайды Aqshamnews.kz.
Алдағы жылдары Қазақстанның саяси жүйесінде елеулі өзгерістер орын алуы мүмкін. Мемлекет басшысы Қасым-Жомарт Тоқаев биылғы Жолдауында бір палаталы Парламент құру бастамасын көтеріп, бұл ұсыныс қоғамда қызу талқыға түсті. Президенттің айтуынша, мұндай реформа бюджет жүктемесін азайтып, заң шығарушы органның жұмысын оңтайландыруға мүмкіндік береді.
Қаржы вице-министрі Абзал Бейсенбекұлының айтуынша, 2026 жылы Парламенттегі депутаттар мен әкімшілік қызметкерлердің еңбекақы қорына 7,8 млрд теңге бөлінуі мүмкін.
«Бұл депутаттарды, сондай-ақ Парламенттегі саяси және әкімшілік мемлекеттік қызметшілерді қамтамасыз етуге арналған. Бұл – еңбекақы төлеу қоры», – деді ол.
Кейінгі 10 жылда шығындар қалай өзгерді?
Kursiv.media мәліметінше:
- 2015 жылы бір депутатты ұстауға шамамен 70 млн теңге жұмсалса,
- 2024 жылы бұл сома 195 млн теңгеге жеткен.
2024 жылы Парламенттің жалпы шығыны – 29 млрд теңге.
Еске сала кетейік, бүгінде Мәжілісте 98 депутат, Сенатта 50 депутат жұмыс істейді.