Биылғы саяси маусым бірқатар стратегиялық кадрлық ауыссыммен басталды. Кім кетті? Кім қалды? Ақорда не дейді? Толығырақ aqshamnews.kz материалында.
Президент жарлығымен бірқатар маңызды тағайындаулар жасалды:
- Оқу-ағарту министрі болып 42 жастағы Жұлдыз Сүлейменова келді (бұрын Мәжіліс депутаты),
- Жасанды интеллект және цифрлық даму министрлігін Жаслан Мәдиев басқарды (вице-премьер қызметін қатар атқарады),
- Сыртқы істер министрі болып Ермек Көшербаев тағайындалды.
Қызметінен кеткендер қатарында:
- Мұрат Нұртілеу;
- Тамара Дүйсенова;
- Ернар Баспаев;
- Күнсұлу Закария;
- Қанат Шарлапаев.
Ақорда не дейді?
Президенттің көмекшісі - баспасөз хатшысы Руслан Желдібай кадрлық өзгерістерді түсіндірді.
Кейінгі кадрлық өзгерістерге байланысты БАҚ өкілдерінен көптеген сауал түскен. Оның айтуынша, бұл - әдеттегі кадрлық ротация. Негізгі мақсат - мемлекеттік жүйедегі ең маңызды бағыттардың тиімділігін күшейту.
"Мемлекет басшысы жуырдағы Жолдауында ұлттық экономикаға түсетін инвестиция көлемін арттыруды басым міндеттің бірі ретінде белгіледі.
Бұл маңызды сала тәжірибелі дипломат Мұрат Нұртілеуге жүктелді. Президенттің көмекшісі ретінде ол халықаралық инвестициялық және сауда ынтымақтастығын ілгерілету мақсатында шет мемлекеттердің жоғары деңгейдегі өкілдерімен, сондай-ақ әлемдік ірі компаниялардың жетекшілерімен байланысты дамытады.
Мемлекет басшысының Жарлығымен Жаслан Мәдиев премьер-министрдің орынбасары - Жасанды интеллект және цифрлық даму министрі болып тағайындалды. Ведомство басшысы Жолдауда айтылған Қазақстанды цифрлық мемлекетке айналдыру жөніндегі мақсатты іске асырумен шұғылданады. Президент министрге стратегиялық маңызы зор жұмысты атқаруға қатысты бағыт-бағдар берді.
Сонымен қатар премьер-министрдің келісімі бойынша Мәжіліс депутаты Жұлдыз Сүлейменованы оқу-ағарту министрі лауазымына тағайындау туралы шешім қабылданды. Жаңа министр қоғамдағы белсенді қызметімен және білім беру саласындағы мол тәжірибесімен белгілі", - деп түсіндірді Руслан Желдібай.
Алматыда әкім Дархан Сатыбалды жаңа орынбасарлар тағайындады:
- Нұрлан Әбдірахым;
- Алмасхан Сматлаев.