Жауын-шашыны, желі мен селі қатар көрініс беретін «Аласапыран» амалы жүріп жатыр. Қазекең бұл амалды аса қауіпті санап, сақтанып отырған...
Сәуірде түрлі амал бар. Мысалы, «Бесқонақ» амалы оңтүстікте наурыздың соңына қарай өтсе, батыста сәуірдің алғашқы аптасында көрініс береді. «Отамалы» амалы, оны қазекең «ойылған қыс» деп атаған. Мұнан кейін «Сәуір» амалы келеді.
Ал Арқада осы мезгілде орын алатын «Алтын күрек» деген амал (өкпек жел, салқын самал) бар. Сәуірдің соңы мен мамырдың басында алапат нөсер болады. Бөкендер мен киіктер төлдейді...
Аспан денелерінің қозғалысы «Аласапыран» амалының жауын-шашынды, лайсаң болатынын аңғартқандай. Алдағы аптада ашық, жылы күндер де болатынын жоққа шығармаған абзал. Сонымен, Қоян жылы кетті. Елімізге ғана емес, әлемге келген қаншама апат, зілзала, қауіп-қатердің себепкері болды. Ұлу жылы (әлде Ұлыма ма) келіп жетті. Жылдың басы жауын-шашынды, ылғалды болып басталды. Бұл молшылықтың нышаны.
Қалай десек те, көктем шықты. Аз күнде өрік гүлдесе, артынша шие, сосын алма гүлдейді. Табиғат-Ана мейірімін шашып, сол жемістерді ел-жұртқа бұйыртсын.
Жырлайды дала қар әнін,
Шулайды сулар «көктем» деп.
Ұйқысын бұзып жағаның
Соғады қырдан өктем леп.
Жамырай шулап жас төлдей,
«Келді деп көктем!» жар салып,
Тасқынға толып төскей-бел,
Көктемді жатыр қарсы алып.
Көктем-қыз әне, келеді,
Жаңартып ескі, көнені.
Жер-көкті шуға бөледі,
Көкте күн нұрын төгеді.
Бусанып, босап жер төсі,
Көктейді енді жон-жонас.
Көктем-қыз жердің еркесі,
Басталды тірлік қарбалас...
Өңірімізден шаттық, өңімізден күлкі кетпесін. Табиғат тосын мінез танытпасын.
Жаңа жылымыз құтты-ырысты болсын, ел жұмысты болсын!